ტრიფონ გამსახურდია

ფარმაცევტი-პროვიზორი ტრიფონ გამსახურდია დაიბადა 1896 წელს სენაკის მაზრის სოფელ ნოსირში. 1924 წლიდან ცხოვრობდა გორში, მუშაობდა აფთიაქის რეცეპტორად.

აფთიაქის რეცეპტორობიდან წითელი ჯვრის რაიონული კომიტეტის თავმჯდომარეობამდე

1929 წლიდან 1937 წლის 23 აგვისტომდე იყო გორის საქალაქო საბჭოს დეპუტატი. 
1931 წელს ის დაინიშნა გორის რაიონის ჯანმრთელობის განყოფილების გამგედ, სადაც იმუშავა 1937 წლამდე. ამავე პერიოდში დაინიშნა წითელი ჯვრის რაიონული კომიტეტის თავმჯდომარედ.

1937 წელს ის დააპატიმრეს, 1940 წელს კი უდანაშაულოდ ცნეს. ამის შემდეგ ტრიფონ გამსახურდია დაბრუნდა გორში. მუშაობა დაიწყო სოფელ ტყვიავის აფთიაქის გამგის თანამდებობაზე. 1962 წლიდან გადაიყვანეს სამუშაოდ გორის I აფთიაქში რეცეპტორ-კონტროლიორის თანამდებობაზე, სადაც იმუშავა სიცოცხლის ბოლომდე. გარდაიცვალა 1993 წელს. 

ტრიფონ გამსახურდიამ თავისი უანგარო შრომით, ყურადღებით, სიყვარულითა და ზრუნვით ყველა გორელის და არამარტო გორელის უდიდესი სიყვარული და პატივისცემა დაიმსახურა. მისი მემორიალი დღეს განთავსებულია გორში, პირველი აფთიაქის წინ.